مسلسل ليل - الحلقة 76
بالحلقة 76 من مسلسل ليل، الأجواء بتكون متوترة من البداية. رنا بتكون معصبة من الست هند، وبتروح تقعد مع بلال وبتخبره إنو نبيل جايي مع الدكتور، وبتحاول بنفس الوقت تستدرجو ليعرف شو ناوي نجم يعمل بيارا ووين مخبيها، بس بلال بينتبه وبيسكر الموضوع وما بيعطيها أي معلومة.
بعدها بيوصل باسم وهو قلقان كتير على يارا، وبيحاول يقنع بلال يدلّه على مكانها، خاصة إنو بيعرف إنها بتخاف من العتمة. حتى دافع عنها قدام رنا واعتبر إنو معها حق بكل ردات فعلها بعد اللي مرت فيه، لكن بلال بيضل متمسك برفضه.
بهاد الوقت بيوصل نبيل مع الدكتور، ورنا بتاخدو عجنب، وبرجعوا يفتحوا موضوع الطلاق، بس هي بتكون حاسمة إنو ما رح تترك البيت وتخلي عبير تاخد مكانها. بعد الفحص، الدكتور بيأكد إنو وضع الست هند صعب ولازم عملية، لكنها بترفض إلا إذا رجعوا نجم وورد لبعض، وكمان تنحل قصة رنا ونبيل.
باسم بيستغل معلومة وصلته عن طريق عبير من نبيل، وبيوصل لمكان يارا. بلاقيها مرعوبة من العتمة، فبيطمنها وبيطلعها بسرعة من المستودع، بينما نجم بيكون طول الليل عم يفكر كيف يواجه جنى ويارا ويرد على كل اللي صار.
لاحقًا، نجم وورد وملاك بيرجعوا عبيت الست هند، والفرحة بتكون كبيرة بوجودهم، خصوصًا عند الست هند. نجم بيصارح أمه بالحقيقة وبيكشف إنو جنى ما كانت حامل وكل القصة كانت كذبة، وهاد الشي بيوقع عليها صدمة قوية.
فجأة بيوصل هشام وجيهان، وبتعترف جيهان بكل شي وبتطلب السماح. بعد تردد، نجم بيقبل يساعدها ويدخلها البيت، وحتى العمة نادرة بتعلّق بطريقتها الساخرة على الموضوع.
بعدها نجم بياخد قرار المواجهة، وبيتفق مع باسم يروحوا لعادل ويسكروا ملف نورس نهائيًا مقابل تسليم المصاري. بنفس الوقت، باسم بيحاول يبعد يارا عن فكرة الانتقام، وبيوديها لعند رولا لتساعدها نفسياً.
لكن الأمور بتنفجر فجأة لما يارا تعرف من عادل إنو نورس كاتب كل أملاكه باسم ورد، وما إلها أي نصيب. بهاللحظة بتفقد أعصابها، وبتدخل وهي حاملة سلاح، وبتوجهو مباشرة لنجم. ورد بتركض فورًا وبتوقف قدامه لتحميه.
ولما كانت يارا على وشك تطلق النار، بينطلق صوت رصاصة… والمفاجأة إنو باسم هو اللي أطلق النار عليها! يارا بتوقع عالأرض، وباسم بينهار جنبها وهو عم يبكي، بمشهد صادم وقوي 😱🔥