مسلسل ليل - الحلقة 69
يارا وجيهان بيكونوا مختبّيين وعم يتابعوا اللي عم يصير، وبهالوقت بتفوت رنا لعند جنى وبتطلب التسجيل اللي بيثبت خيانة نبيل. جنى بتحاول تنكر، لكن نجم بيتدخل وبيضغط عليها لحتى تعطيه، وبالفعل رنا بتاخدو وبتطلع فورًا.
ورد بتكون زعلانة ومجروحة من تصرّف نجم، وبتواجهو إنو ضحّت كرمالو، وهو بالمقابل عم يحمي جنى، وبتتركه وبتفل وهي مكسورة.
العمة نادرة بيكبر شكّها، وبتقرّر تروح بنفسها لعند جنى لتتأكد من الحقيقة. نجم كمان بيرجع لعند جنى وبيسألها بشكل مباشر إذا الطفل إلو، وهي بتكذب وبتأكد إنو ابنو، فبيقرر يحط حراسة عليها ويمنعها تطلع من البيت.
على جهة تانية، رنا بتكون منهارة وهي عم تسمع التسجيل، بس بتشد حالها وبتقرر تكمّل وتروح لعند محامي لتبلّش بإجراءات الطلاق.
بالشركة، ورد بتروح تاخد ملاك وبتشوف باسم عم يقضي وقت معها، وبنفس الوقت بيكون عم يزرع الشك عند هيا بموضوع الشيكات، وكأنو في أزمة مالية جاية، وفعلاً هو عم يخطط يوقعهم بمشكلة كبيرة.
يارا بتتواصل مع باسم وبتخبره إنها محاصرة ببيت جنى بسبب الحراسة، لكنه ما بيعطي الموضوع أهمية. بعدها عادل بيضغط عليها وبيهددها بصور تثبت تورّطها مع عماد، فبتضطر تكذب عليه وبتعطيه قصة ملفّقة عن الحمل، وبتخبي إنو جيهان هي الأم الحقيقية.
نجم بيروح عالشركة، بس واضح إنو تفكيره كله عند ورد. هيا وورد بيحاولوا يحلّوا أزمة الشيكات، وهيا بتندم لأنها ما سمعت كلام نجم من البداية.
ولما نجم بيعرف إنو ورد بدها تحكي مع باسم، بيمنعها، فبتنفجر بوجهه من القهر والغيرة. هو بيحاول يهدّيها وبيأكدلها إنو بحبها، لكنها ما بتتحمّل وبتطلب منو يجيب ملاك لعندها، وبتترك المكان.